أرشيف الأنباط

ordu haber
Al-anbat News

#هاشتاغ مع سحر بحب اللحظات

الأنباط - سحر الخطاب 

بحب نسمة الهواء الباردة الي ع الفجر ،و الصور العفوية و صوري و انا طفلة ، و الرسائل الصفيرة الي ما بكون متوقعاها،و القعدة ع البحر في ليلة مظلمة، و الخطط الي بخططها لما اكون بدي اعمل مفاجأة لحدا تسعده، و الاشخاص الي بيمروا صدف في حياتي، و الحقيقة لما بتنكشف لحالها من دون ما أبذل اي مجهود لحتى أوصللها او اعرفها،و "الاهتمام اللطيف" الي بيجي في وقت بكون حاسه فيه بالوحدة، و المصاري الي بلاقيها صدفة في جيبة جاكيت زمان ما لبسته،و الاغنية الي بتذكرني بلحظات نادرة،و الفوضى الي بتكون حولي احيانا ،و ريحة العطر الي بتذكرني بموقف معين،و الابتسامة الي بيبتسمها في وجهي انسان ما بعرفه، الثقة الي بيعطوني اياها بعض الاشخاص لما يحكولي اسراراهم و هما متأكدين اني مستحيل اخون الثقة او الأمانة،و لما اكون سرحانة و حدا يكون مركز معي لدرجة يسألني "ليش بتسرحي كتير"؟ 
و الطريق الي بمشي فيه عشان اوصل لهدف معين،"حتى لو ما وصلت اله" المهم اني جربت و ما خفت،و الانفعالات الطبيعية، بحب اللحظات الي بحمد ربنا اني خسرت شي زمان كنت كتير زعلانة اني خسرته، و الامان الي بحسه في حضن أمي، و اللحظة الي بقعد اقنع فيها بابا على طلعة و بالاخر يوافق، و الاقنعة الي فجأة بتنزل قدام عيني، و العتاب الي من باب المحبة و العشق، و اللحظات الي بتحس فيها انو في ناس بتخاف تخسرك،و القرارات الصارمة الي باخدها فجأة نتيجة تصرف معين ما عجبني، و العشوائية في الكلام مع شخص لسه ما بعرفه منيح،و حبي ل أشيائي الخاصة،و اللحظات الي بتراجع فيها عن بعض الامور الي بشك انها ممكن تأذيني،
اللحظات الي باخد فيها نفس عميق و بعدين بحكي فيها كل الي جواي من دون ما احسب حساب،والعلاقات البائسة الوهمية الما بتنتهي و بتخلص..

**بحب اللحظات الي بحس فيها انه ربنا معي و كلها أمور بتثبتلي انه اديش ربنا كريم و اني مش لحالي .. لحظات ممكن تحسسني بالامان و اني لسه بخير .. و لسه ما تغيرت اشياء كتير حلوة جواي ..!