أرشيف الأنباط

ordu haber
Al-anbat News

اني أتوحوح

 

عن جد ..وحوحة ..آح أح ..برد يا ناس ..فش غاز ..فش كاز ..أح أحووووه ..فش إلا صوبة كهربا ..و إذا ولّعتها رح تولّع الفاتورة ..عن جد أتوحوح ..وحوحة مش طبيعية..مش عارف أولّعها وإلا ما أولّعها ..؟! يلعن عرظ التسعيرة ..

الناس اللي زي حالتي شو بيعملوا بهيك حالة ..؟ ساعدوني على اتخاذ القرار المناسب ..آآآآآآآآآآآآآآح أح أحوووووووووووه ..المشكلة مش مشكلة ساعة و ساعتين ..المشكلة بيحكوا المنخفض عميق ..و رح يطوّل شوية و شويّات ..يا بااااااااااااااي ..وبعدين ..لازم أقرر سريعاً ..أشعلها و إلا ما أشعلهاش ..؟؟!

لو اني مش ساكن بعمارة ..كان الحل بسيط ...أح أأح أحووووه ..كان بكل بساطة بنيت خربوشة بالحديقة أو بالحوش ..وكان لميت كل خشب الحارة وولعت نار و قعدت ..و تدفّيت ..بس العمارة ما بينفع أولّع نار ..خايف العمارة تولّع ..أح أح أحوووووووووووه ..

البرد يزداد يا بني آدمين ..مش معقول ...!! نسيت أحكيلكم أنا مش عزّابي ..عندي زوجة وأطفال ..والأطفال يرجفون برداً ..وعاملين سنفونية ( الوحوحة ) الجماعيّة ..وح وح واني ..أح أحووووووووووووووووه ..شو يا ناس ..؟ أشغل صوبة الكهربا والا شووووووووووووو..؟ على الأقل عشان الأطافيل ..

كلكم تقولون الآن : ولعها يا لعين الوالدين ..ولعها يا مقصوف العمر ..ولعها الاطفال ماتوا من البرد ..والفاتورة بعدين بنشوف قصتها ...

ما تخافوا ..ولعتها من أول وحوحة ..ما خليت عيّل من عيالي يشعر بالبرد ..بس حبيت أحطكم بجو حكومي خالص ..كيف يتوحوح المواطن وهي تسأل نفسها نشغلها وإلا ما نشغلها ..وللآن لم تتخذ قرارها بتدفئة المواطن ..!