أرشيف الأنباط

ordu haber
Al-anbat News

هينا قاعدين بنستنى

 

 

 

حسب المصادر الجوية فإن منخفظاً جديداً قادم نحونا ..وهذا يعني أيضاً ..ارتباكاً جديداً ..و لخبطة أخت فلاتة ..و بهدلة على الآخر ..و قطعة بنص الطريق ..ودوشة لها أوّل وليس لها آخر ..

كنّا دائما ننتظر المطر و الغيث القادم من الله ..الآن و رغم أننا ننتظر ..بس انتظارنا مشوب دائما بحالة خوف شديدة من الفياضانات و السيول و المناهل مش ملحقة ..و كركبة السير ..و مشكلة الكاز ..و الصوبات بشكل عام ..

هينا قاعدين نستنى ..و بقعدتنا بدنا نشوف المرّة هاي كيف رح تتعاطى امانة عمان ..وغيرها من بلديات المملكة ..بدنا نشوف انهم مستعدين عن جد لكل الاحتمالات و لكافة أشكال الطوارئ ..و انهم استفادوا من التجارب السابقة وإلا رح يتعاملوا كمان مع الموضوع زي ما تعاملوا كل مرّة ..

هينا قاعدين نستنى ..ونشوف أن المسؤولين رح يكونوا هالمرّة قد المسؤولية ..وأن كروشهم تستحق التصفيق ..أم أنهم ما زالوا مسؤولين مش فاضيين إلا للهط و الفساد الإداري و الترهل ..وكل واحد يرمي حمولته على المسؤول الآخر ..

هينا قاعدين و نستنى ..ورح نشوف إذا نعمة ربنا التي أهدانا إياها نستطيع الحفاظ عليها و الاستفادة منها بالادخار ..وإلا إحنا ناس لا نقدر النعمة ..ولا نحافظ عليها ..ومهنتنا الوحيدة هي الشكوى والتذمر و صناعة الاحباط للناس و للذين يحبون أن يعملوا ...

هينا قاعدين و نستنى ..ويا خبر اليوم ببلاش ..