أرشيف الأنباط

ordu haber
Al-anbat News

مع شاعر حداثي



سارح : هات يا أبو القصايد ....سمّعني قصيد

الشاعر : فك عني يا سارح ....إنتَ ما بدّك تسمع .....بدّك تتخوث

سارح : بالعكس ....والله بحب الشعر ....وأهيم به عشقاً

الشاعر : بس آخر مرة بهدلتني قدام الناس ....

سارح : الشاعر لازم يكون صدره واسع ....ولازم يتحمل مزح ....كنت أمزح يا زلمة

الشاعر : يعني حاب تسمع عن جد ....؟!

سارح : أي والله ...

الشاعر : طيب أسمع لَعَاد : تخربطَ الظلامُ على وَسَن الحديقة ....واجتباني صيد الوشوشة ....كنت أمسك حالتي .... أشرب دفن الحياء ....وأسير باليدين على قدم ثابته

سارح : يا سلام ....يا سلام ....!! فعلاً إنتَ فلته في عالم الشعر ....كمّل ....كمّل يا حبيبي ...

الشاعر  ( منتشياً ): خالفت مواعيد الشجر ...أثقلتُ بالحرق على سحب الجلال ....وجلست أفرّق بين الشواء الأخير وعصر الغروب ...وأقيس حاجة الجدار للورود التالفة .

سارح : يا عيني ....يا حلاوتك ....عظمة على عظمة يا ست

الشاعر : شو بتفكرني أم كلثوم ...؟

سارح : وَلَكْ ....شو أم كلثوم ...؟! إنتَ أحلى ....هذا الحكي اللي هسه قلتو ....ما حدا يقدر يقولوا إلاّ إنتَ ....يا سلام عليك ....هذا الحكي اللي بعبّي المخ ....فعلاً مخي هسّة معبّى على الأصلي

الشاعر : مش عارف ....ليش مش قادر أطمّن لكلامك ....؟!

سارح : بالعكس لازم تطمن ...ولازم يكون عندك ثقة في حالك ...لا تنهز ....اللي حكى هالشعر العظيم ....لازم ما ينهز ...

الشاعر : عن جد يا سارح ....إنتَ معجب بشعري ...؟!

سارح : إنتَ عارفني ....ما بجامل ولو على حساب أمي ....

الشاعر : يعني شعري حلو ...وممكن أصير شاعر كبير ....

سارح : والله اذا ظليت على نفس الرشة ....لتصير أكبر شاعر في داركو ....

الشاعر : أصلاً في دارنا ما فيه شاعر غيري ....

سارح : يعني إنتَ ناوي تطلّع هالشعر لبيوت ثانية

الشاعر : نفسي العالم كلّو يسمعني ....

سارح : بدّك نصيحتي وعن جد ....

الشاعر : طبعاً .....وتأكد اني راح أستفيد منها

سارح : اوعى تحكي لناس انك بتكتب شعر

الشاعر : ليش ...؟

سارح : قول انك تكتب الغاز ....تكتب حُجُب ....تكتب كتابك على وحده ....بس شعر.... حرام عليك

الشاعر : مالك قَلَبِتْ ....

سارح : ما إنتَ قلبت مخي بشعرك  المشعوط ....ولك أصلاً إنتَ  مش فاهم شو بتكتب ....!!

الشاعر : مش مهم أفهم ....المهم الإحساس ...

سارح : ياحبيبي الإحساس بعد الفهم ....ولكو ....قرفتونا وكرهتونا بالشعر ...

الشاعر : الله يسامحك ....بس يبدو لي إنتَ ما بتفهم في الشعر ...

سارح : صحيح أنا ما بفهم في الشعر ....بس بفهم بالناس ومن فهمي إلك ....لسة ما صرت ناس ....ظُبْ شعرك والله يسهل عليك ....دربك خظرا