أرشيف الأنباط

ordu haber
Al-anbat News

اليوم إللي اختفى فيه الزلمة

 

 

 

أُمْ شَفْرَة: يا وليّه أٌقعدي

المشرمحيّة: مِشْ عارفة أقعد..الزلمة ما طَلْ

أُمْ شَفْرَة: الغايب عذره معو ..هسّه ما تحسّي إلاّ وإنّو ناط زي القرد

المشرمحيّة: لا تحكي عنّو قرد ..هاظ غزال ..هاظ لدّاد حبيب القلب والروح

أُمْ شَفْرَة: أُف أُف ..هاظ غالي على قليبك

المشرمحيّة: وقليبي عمره  ما خفق لغيرو

أُمْ شَفْرَة: لعاد ليه زعلتيه..؟؟

المشرمحيّة: زعلتو زعل محبّة ..ما فكّرت يعملها زعلة عن جد ..!!

أُمْ شَفْرَة: طيّب اتصلتي بكل معارفو..؟؟

المشرمحيّة: ما خلّيْتْ ولا بقّيتْ يا خيتي ..حتى خزوق الطوب فتّشتهن

أُمْ شَفْرَة: طيّب دوّرتي بخزوق طوب الجيران ؟؟

المشرمحيّة: مهو وقت مسخرتك يا أم شفرة

أُمْ شَفْرَة: وَلْ ..بحاول أطلعك من جوّك ..!!

المشرمحيّة: لا تطلعيني ولا تلمعيني ..بس نقطيني بسكاتك ..

أُمْ شَفْرَة: وإذا ما أجا من هان للصبح ..شو بتعملي ؟؟

المشرمحيّة: والله بأنجن وأنهبل ..؟؟

أُمْ شَفْرَة: وإذا ما أجا من هان لبكرة الظهر ..؟؟

المشرمحيّة: والله بنجلط ..؟؟

أُمْ شَفْرَة: طيّب وإذا ما أجا من هان لبكرة المسا ..

المشرمحيّة: والله لخلّي عزريين يوخذك ..مالِك بتفاولي عَ الزلمة ..؟؟

أُمْ شَفْرَة: طيّب خلص خلص ..رَحْ أريحك

المشرمحيّة: شو بتعرفي وين هو ؟؟

أُمْ شَفْرَة: آه بعرف ..

المشرمحيّة: وين ..يا خيتي ريحيني ..؟؟

أُمْ شَفْرَة: جوزك ما رَح يجي اليوم ..

المشرمحيّة: ليش ..عامل شي..؟؟

أُمْ شَفْرَة: لأ ..بسْ اليوم الجمعة ..وجماعة الأنباط حاجزينو ومش راظين يطلعوه ..

المشرمحيّة: إيش بتقولي ..؟؟ وهسّة هو في الأنباط يْسَرْتِحْ و يْمَرتِحْ ..وأنا ماكلة هوا قلقانة عَليه ..؟؟

أُمْ شَفْرَة: إذا مِشْ مصدقة خذي هالرقم واتصلي وتأكدي

المشرمحيّة: رقم مين هاظ..؟؟

أُمْ شَفْرَة: هاظ رقم ( حسين الجغبير ) إللي حاجز جوزك لبكرة

المشرمحيّة : طيّبْ ..حسابو معي بعدين أبو بكسة البندورة