أرشيف الأنباط

ordu haber
Al-anbat News

الحل ..نرجع لشغلتنا الأولى

 

 

المشرمحي: شفتي يا المشرمحية شفتي ؟؟

المشرمحية: شو شفت ؟؟

المشرمحي: بدهم يرفعوا اسعار الكهربا يا خيّة و الرئيس مش راد على حدا

المشرمحية: أنا مرتك مش خيتك ..وما يرفعوها إحنا شو دخلنا ؟؟

المشرمحي: ما إحنا إللي رح نوكل هوا فيها

المشرمحية: إذا فيها أكل ..يا مرحبابهم

المشرمحي: يا مَرَة لا تُمرثي قلبي ..منين ودنا نجيب ؟؟

المشرمحية: وليش نجيب أصلاً ..خليها هيك

المشرمحي: وبعدين معك ..إنت مش حاسّة باللي بدّو يصير

المشرمحية: يا زلمة والله حاسة ..بس إيش طالع بإيدي

المشرمحي: طيّب هيك نظلّنا نتفرّج؟

المشرمحية: لأ طبعاً ..

المشرمحي: ها شو نعمل ..؟؟

المشرمحية: بلاش نتفرّج ..خلينا منظبّين جوّا

المشرمحي: ما هُم رح يلحقونا لجوّا

المشرمحية: طيب نطلع برّة برّة

المشرمحي: ما هُم رح يعمّموا علينا

المشرمحية: طيّب ننتحر

المشرمحي: ما معنا تكاليف الموتة ..الكفن والقبر

المشرمحية: أي حيّرتني معك ..شو أساويلك يعني ..أمسكلهم نبّوت ؟؟

المشرمحي: والله ليكسروه علينا

المشرمحية: والحل ؟؟

المشرمحي: اللطم ..نقعد نلطم ..

المشرمحية: يعني نرجع لشغلتنا الأولى ؟؟

المشرمحي: هو فيه شغل غيرها نعرف نشتغلو ..يا الله بلشي